ҚР Еңбек және халықты әлеуметтік қорғау министрі Тамара Дүйсенова Қазақстанда 31 мыңнан астам Ресей азаматы жұмыс істеуге ниетті екенін айтты. Оның ішінде 6 мыңнан астам адам жыл басынан бері қоныс аударған, деп хабарлайды Stan.kz ақпарат агенттігі.
Министр қазір Қазақстанда 8,7 миллион азамат жұмыспен қамтылғанын жеткізді. Оның айтуынша, биылғы жылға шетелдік квота 28 мың адамға бөлінген. Оның 15 мыңы ғана игерілген.
«Жыл басынан бері Ресейден Қазақстанға 262 мың адам келді. 6 017 адам келу мақсатына республикаға жұмысқа орналасуды көрсеткен», – деді министр.
Тамара Дүйсенова ЕАЭО елдерінің азаматтарын жұмысқа орналастыру үшін квота талап етілмейтінін атап өтті. Олар Қазақстанға еркін кіріп, жұмыс істей алады.
«Қазіргі таңда Қазақстанда 25 301 ресейлік азамат жұмыс істейді. Өтініш берушілердің жаңа санын есепке алғанда, бұл республика аумағында жүрген және жұмысқа тұру мақсатын көрсеткен шамамен 31 мың адам», – деді министрлік басшысы.
Сонымен қатар, Дүйсенова Қазақстанға келген ресейліктердің еңбек нарығына айтарлықтай әсер етпейтінін баса айтты.
«Егер азаматтардың көп ағыны болса және бұл ұлттық қауіпсіздікке қауіп төндіретін болса, онда біз қосымша шаралар қабылдаймыз», – деп қорытындылады министр.
Өзге де жаңалықтарды оқу үшін Telegram арнамызға жазылыңыз!