14 қаңтарға қараған түні Алматыда белгісіз біреулер журналист Динара Егеубаеваның көлігінің терезесін шағып, от қойған. Бұл жөнінде журналистің өзі және белсенділер, «Не дейді?» YouTube-арнасы хабарлады.
Арнаның хабарлауынша, көліктің салоны түк қалмай өртеніп кеткен. Журналист тікелей эфир кезінде мұны «өз өміріне жасалған қастандық» деп бағалады.
«Салонның ішінде кірпіш жатыр. Оны көліктің артқы әйнегінен лақтырған. Мен есеңгіреп қалдым… Көлік аулада тұр. Оның жанында өзге көліктер тұр. Жарылыс болуы мүмкін еді. Өте үлкен. Онда бірінші қабатта тұратын адамдар қаза табуы мүмкін еді. Олардың не істеп жатқанын түсінесіздер ме? Полиция, өрт сөндірушілер келді… Бұл Тоқаевтың «Жаңа Қазақстаны» деді журналист Динара Егеубаева тікелей эфир кезінде.
Қазақстанда журналистер кәсіби қызметіне байланысты тосқауыл-кедергілерге жиі ұшырайды. «Шекарасыз тілшілер» халықаралық ұйымының «Сөз бостандығы индексінде» Қазақстан 180 елдің арасында 122-орында тұр. Елде сөз бостандығының ахуалы күрделі деп бағаланады.
Өзге де жаңалықтарды оқу үшін Telegram арнамызға жазылыңыз!