«Қазақтелеком» мен ақпараттандыру және байланыс қызметкерлер кәсіподағы жаңа ұжымдық шартқа қол қойды. Серіктестіктің басқарма төрағасы Қуанышбек Есекеев Facebook парақшасындағы мәлімдемеде жаңа келісім-шарт әлеуметтік пакетті толық сақтай отырып, өндіріс қызметкерлерінің айлығын айтарлықтай арттыратынын айтқан.
Өндіріс жұмысшыларының жалақысы біліктілік деңгейіне қарай орта есеппен 20-50 пайызға артады.
«Ұжымдық шартымыздың жаңа нұсқасында біз, ең алдымен, жаппай жұмысшылар мен инженерлік-техникалық қызметкерлердің лауазымдық жалақысының төменгі деңгейін көтеру, сондай-ақ қызметкерлердің ай сайын алатын жалақысының бөлігін көбейту міндетін аламыз», – дейді Есекеев.
Бұдан бөлек компания көп балалы және ерекше қажеттіліктері бар балаларды тәрбиелеп отырған отбасыларды қолдау бағдарламасын да қоса бекіткен.
«Қазіргі уақытта компания басшылығы қызметкерлердің жекелеген санаттарына әлеуметтік қолдау көрсету бойынша бірқатар бастамаларды қарастыруда, бұл ретте біз қызметкерлеріміздің өздерін де, олардың балаларының білім алуына инвестициялауды жалғастырамыз», – деп қосты басқарма төрағасы.
Алматыда «Қазақтелекомның» техникалық бөлімшесінің қызметкерлері қаңтар айының аяғында ереуіл ұйымдастырған еді. Жұмысшылар азық-түлік бағасының қымбаттауын алға тартып, жалақыны көтеруді талап еткен.
Өзге де жаңалықтарды оқу үшін Telegram арнамызға жазылыңыз!