Бұл туралы Мәжілісте «Nur Otan» партиясының сайлау алдындағы міндеттемелерін іске асыруға арналған талқылау кезінде Премьер-Министр Асқар Мамин айтты.

– Жаңа сын-қатерді ескере отырып, отандық денсаулық сақтау саласын білікті кадрлармен, заманауи жабдықпен, диагностика әрі емдеу әдістерімен қамтамасыз ету бойынша нақты қадамдар жүзеге асырылмақ. Енді дәрігерлердің еңбекақысы 2,5 есеге көтеріледі. Алдағы 2023 жылы дәрігерлердің жалақысы  561 мың теңгеге дейін барады.Ал орта медициналық персоналдың жалақысы 201 мың теңгеге дейін артады, – деді А. Мамин.

Оның айтуынша, барлық көздерден денсаулық сақтау саласын қаржыландыру ЖІӨ-ден 5 пайызға дейін көтеріледі.

«2025 жылға дейін барлық өңірде 20 заманауи медициналық орталық салынады. 2022 жылы Нұр-Сұлтан мен Алматыда екі ғылыми-инновациялық көпбейінді клиника іске қосылады», – деді А. Мамин.