Қазіргі уақытта желіде жолаушылар тасымалымен айналысатын жеке тұлғалардың яғни такси жүргізушілеріне мобильді аударымдардан бас тартып, қолма-қол ақшаға көшуге шақыратын ақпараттар таралуда, деп хабарлады Қаржы министрлігінің баспасөз қызметі.

Салық заңнамасына мобильді аударымдарды пайдалануға қатысты енгізілген өзгертулер, жеке тұлғалардың жеке аударымдарын / кәсіпкерлік мақсатта жүзеге асырылатын мобильді төлемдерден / бөлуге арналған. Олар бизнес қауымдастықпен және банктермен бірнеше рет талқыланды.

Бұл бастамалардың мақсаты цифрлық кеңістікте бизнесті дамытуды көздейді, қолма-қол ақшаға көшуді мүлдем көздемейтінін ескеріңіз.

Мұнымен қоса, барлық мәлімет мемлекеттік кіріс органдарына беріледі екен деген ақпарат та негізсіз. Алаңдауға ешқандай негіз жоқ. 2022 жылдан бастап банктерден тек кәсіпкерлік шоттарына түскен төлемдер туралы ақпарат алу жоспарлануда. Сондықтан, жеке аударымдарға салық салынбайды.

Ал егер сіз жеке кәсіпкер болсаңыз, салық салу бойынша өзіңізге ыңғайлы режимді таңдай аласыз, – деп хабарлады Қаржы министрлігінің баспасөз қызметі.

Мысалы, такси жүргізушілері патент негізінде арнайы салық режимін қолдана алады. Бұл режим табысы жылына 10 миллион 300 мың теңгеден аспайтын жағдайда ғана қолданылады.

Кассалық аппараттарға қатысты. Қазір бірнеше мобильді қосымша бар. Кәсіпкер онлайн кассаның мобильді нұсқасын жүктеп алып, заңды түрде пайдалана алады.

Ал салық есептілігі e-Salyq Business қосымшасын енгізу арқылы автоматты түрде жасалады. Бұл шаралардың барлығы бизнесті жүргізуді одан әрі жеңілдетуге бағытталған.

Еске салайық, қабылданған мораторий аясында жеке кәсіпкерлер 2023 жылға дейін табыс салығын төлеуден босатылған.

Сондықтан, құрметті кәсіпкерлер, арандатушылыққа бой алдырмай, уәкілетті органдардың ресми ақпаратына ғана сенуге шақырамыз, – делінген таратылған ақпаратта.

Еске сала кетейік, осыған дейін жеке кәсіпкерлік үшін қандай салық түрін таңдауға болатыны туралы жазғанбыз. Салық кодексіне қандай өзгерістер енгізілгені туралы да хабарлағанбыз.

BAQ.KZ