Дүйсенбіде Азия биржаларының ашылуында мұнай бағасы 3 пайызға өсіп, барреліне 90 доллардан асты. Таяу Шығыстағы АҚШ пен Иранның өзара шабуылдарының күшеюі Ормуз бұғазы арқылы өтетін энергия ресурстарының жеткізілімін одан әрі шектеді, деп хабарлайды Tengrinews.kz.
ice.com сайтының ақпаратынша, Brent маркалы эталонды мұнайдың қыркүйектегі фьючерстік келісімшарттарының құны GMT уақытымен 23:43-те (Астана уақытымен 4:43) 2,69 долларға көтеріліп, 90,79 долларға жетті. Бұл – 11 маусымнан бергі ең жоғары көрсеткіш.
Сауда-саттық басталғаннан кейін баға сәл төмендегенімен, айтарлықтай өзгере қойған жоқ.
Америкалық West Texas Intermediate мұнайының бағасы барреліне 84,68 долларды құрады, бұл 12 маусымнан бергі ең жоғары деңгейден 2,19 долларға немесе 2,65 пайызға жоғары.
Иран мен АҚШ тоғызыншы күн қатарынан бір-біріне соққы жасап жатыр. Бұған дейін америкалық әскерилер кезекті шабуылдарын бастап, екі америкалық сарбаздың қаза табуына және біреуінің хабар-ошарсыз кетуіне себеп болған Иорданияға жасалған шабуыл үшін Иранды «тез арада жазалауға» уәде берген болатын.
Иран армиясы АҚШ-тың Кувейттегі базаларына екі мәрте қарымта соққы жасады. Дрондардың бірі оқ-дәрі қоймасына шабуылдаған.
Осыдан кейін АҚШ президенті Дональд Трамп Иранды бомбалауға бұйрық берді. ОЛ бұйрықты 2026 жылғы футболдан Әлем чемпионатының финалдық матчі өткен стадионнан шыққан бойда берген.
Өзге де жаңалықтарды оқу үшін Telegram арнамызға жазылыңыз!