Қазақстан Үкіметі әскери-саяси жағдайы шиеленіскен аймақтарға азаматтардың баруына уақытша шектеу қоятын заңнамалық тетіктер әзірлеуді жоспарлап отыр. Бұл туралы Премьер-министр Олжас Бектенов «Ақ жол» партиясының депутаттық сауалына берген жауабында мәлімдеді, деп хабарлайды Qaz365.kz.
Депутаттардың сауалына сәйкес, қақтығыс ошақтарынан азаматтарды эвакуациялау негізінен мемлекет пен әуе тасымалдаушыларына салмақ түсірген. Олжас Бектеновтің айтуынша, жанжал ушыққан сәттен бастап Қазақстанға 66 рейс ұйымдастырылған: оның 27-сі республикалық бюджет есебінен жабылса, қалған 39 коммерциялық рейстің билетін азаматтар өздері сатып алған. Үкімет басшысы коммерциялық рейстердің көптігіне байланысты эвакуацияның жалпы құнын анықтау мүмкін еместігін, алайда эвакуация кезінде мемлекет шамамен 4 млн доллар жұмсағанын жеткізді.
Эвакуация процесінде «Туристік Қамқор» қоры 3 мыңға жуық ұйымдастырылған туристі орналастыру мен тамақтандыруды, сондай-ақ оларды әуежайларға жеткізуді үйлестірген.
Үкімет басшысының сөзінше, азаматтардың эвакуация кезінде де қауіпті аймақтарға саяхаттауды жалғастырғаны алаңдаушылық тудырады. Мәселен, эвакуация жүріп жатқан кезде 191 қазақстандық Алматыдан Дубай мен Шарджаға ұшуға тіркелген.
Үкіметтің алдағы жоспарлары:
- Заңнамалық шектеу: Қауіпсіздік ахуалы нашар өңірлерге баруға уақытша тыйым салатын механизмдер әзірленеді.
- Мобилизация: Дағдарыстық жағдайларда ұлттық және отандық әуе тасымалдаушыларын жедел жұмылдыру рәсімі жетілдіріледі, сондай-ақ төтенше қажеттіліктерге арналған арнайы ұшақтар сатып алу мүмкіндігі қарастырылады.
- Сақтандыру: Қаржы нарығын реттеу агенттігі мен Ұлттық банк сақтандыру секторын дамытудың 2030 жылға дейінгі бағдарламасын және «Сақтандыру қызметі туралы» жаңа заң жобасын әзірлеуде.
Өзге де жаңалықтарды оқу үшін Telegram арнамызға жазылыңыз!