ҚР Премьер-Министрінің орынбасары –Сауда және интеграция министрі Бақыт Сұлтанов азық-түлік бағасын бақылауға арналған жаңа платформа іске қосылатынын жеткізді, деп хабарлайды ҚазАқпарат тілшісі.

«Мемлекет басшының тапсырмасы аясында Үкімет жыл аяғына дейін отандық ауыл шаруашылығы өндірушілерінің өнімдерін ірі сауда желілеріне жеткізуді қолдауға бағытталған заңнамалық бастамаларды ұсынбақ. Мысалы, сөрелерге қолжетімділікті қамтамасыз ету, үстемеақы шегін реттеу және делдалдар санын азайту шаралары пысықталады», – деді ол орталық коммуникациялар қызметінде өткен брифингіде.

Сондай-ақ, министр Qdate аналитикалық платформасының не үшін құрылып жатқанын түсіндірді. «Ол ішкі сауданың жай-күйіне, инфрақұрылым жүктемесіне, импорт-экспорт динамикасына, тауарлар мен қызметтер бағасының өзгеруіне талдау мен мониторинг жасап, мемлекеттік органдарға сапалы аналитика ұсынады. Бұл талдаулардың бәрі ашық жарияланады. Соның арқасында бизнесте әділ бәсеке қалыптасып, тұтынушыларға сапалы өнімді қолжетімді бағамен алу мүмкіндігі туады», – деді Бақыт Сұлтанов.

Еске салсақ, Үкіметтің кеңейтілген отырысында Мемлекет басшысы Қасым-Жомарт Тоқаев қант тапшылығын реттей алмаған Сауда және интеграция министрі Бақыт Сұлтанов пен Ауыл шаруашылығы министрі Ербол Қарашөкеевке сөгіс жариялаған еді.


 

Өзге де жаңалықтарды оқу үшін Telegram арнамызға жазылыңыз!