Желіде «Қасым-Жомарт Тоқаев тұрмысы төмен отбасылардың кредиттерін өтеу туралы Жарлыққа қол қойды» деген видео тарап жатыр. Кадрларда несиеге есептелген өсімпұл да өтелетіні айтылады. Алайда бұл ескі жаңалық, – деп хабарлайды Tengrinews.kz тілшісі.

TikTok-та тараған видеода 1 маусымға дейінгі жалпы қарызы 300 мың теңгеден аспайтын көпбалалы асыраушысынан айырылған отбасылар мен мүгедек бала тәрбиелеп отырған, ата-анасыз қалған 29 жасқа дейінгі жастардың банк алдындағы берешегі кешірілетіні айтылады.

«Несие алушылардың аталған төлемдерін есептен шығару ең алдымен, екінші деңгейлі банктер мен шағын қаржы ұйымдарының есебінен жүргізіледі», – дейді телеарна жүргізушісі.

Алайда TikTok-та жарияланған видео 2019 жылғы жаңалықтан алынған үзінді. Сол жылы маусымда Президент Қасым-Жомарт Тоқаев қазақстандықтардың банк алдындағы берешегіне қатысты жарлыққа қол қойды. Ондағы мақсат – қиын жағдайға тап болған отбасыларға, көпбалалы, мүгедек балалары бар отбасылар, жалғыз асыраушысынан айырылған отбасылар, атаулы әлеуметтік көмек алатындар мен жетім балалардың қаржылық ахуалын жақсарту еді.

Үш күн бұрын жарияланған бұл фейкке сеніп қалған адамдар да жоқ емес. Еліміздегі ірі микроқаржы ұйымдарының мамандары клиенттер төлем жасаудан бас тартып, 1 маусымды күтетінін айтқанын мәлімдеді.   

«Бөлімшемізге бірнеше адам келді, телефондарында жаңағы ролик. Бір-біріне айтып, соған сеніп, сәл күте тұрайық десті. Жалған ақпаратқа сенген адамдар ай сайынғы төлемдерін төлемеуді бастаған. Мұның ақыры кредит мерзімінің өтіп кетуіне, қарыз көлемінің өсуіне алып келеді. Одан кейінгі салдары несие тарихының бұзылуын айтпағанда, өндіріп алу шараларына дейін жетуі мүмкін, сондықтан мұндай ақпараттарға сенуге болмайды», – дейді микроқаржы ұйымы бөлімшесінің басшысы Жәнібек Сексенбаев.