Мемлекет басшысының жарлығымен Есет Берікұлы Байкен Ұлытау облысының әкімі лауазымына тағайындалды. Бұл туралы Stan.kz ақпарат агенттігі хабарлайды.
Есет Байкен – облыс құрылғаннан бергі үшінші басшы.
«Ұлытау облысының әкімі болып Байкен Есет Берікұлы тағайындалсын», – делінген президенттің жарлығында.
Есет Байкен 1986 жылы Қарағанды облысында дүниеге келген. Ол Қазақ гуманитарлық-заң университетін қаржы мамандығы бойынша, ал Е.А. Бөкетов атындағы Қарағанды мемлекеттік университетін заң мамандығы бойынша бітірген. Оның қаржы және құқық мамандықтары бойынша білімі бар.
Еңбек жолын 2008 жылы Астана қаласының Экономика және бюджеттік жоспарлау департаментінде бастады. Әр жылдары Астана әкімінің аппаратында ұйымдастырушылық-инспекторлық бөлімді басқарды, содан кейін президент әкімшілігінде сарапшы және мемлекеттік инспектор қызметтерін атқарды.
2019 жылы Қарағанды облысының Нұра ауданының әкімі болып тағайындалды, кейіннен Астана әкімінің аппаратын басқарды. Сондай-ақ Сарыарқа ауданының әкімі қызметін атқарды. 2022 жылдың қыркүйегінен бастап Астана қаласы әкімінің орынбасары қызметін атқарды.
Өзге де жаңалықтарды оқу үшін Telegram арнамызға жазылыңыз!