SMARTNEWS.KZ басылымының хабарлауынша, астрономдар NASA-ның «Джеймс Уэбб» ғарыш телескопының көмегімен Бета Суретші d (Beta Pictoris d) деп аталатын жаңа экзопланетаны тапты. Ғаламшар жас жұлдызды қоршаған қалың шаң дискісінің ішінде жасырынғандықтан, осы уақытқа дейін көзге түспей келген. Жұлдыз жүйесі Жерден шамамен 63 жарық жылықашықтықта орналасқан.
Зерттеуді Сан-Диегодағы Калифорния университетінің ғалымдары Эйдан Гиббстың жетекшілігімен жүргізген. Ғылыми жұмыс The Astrophysical Journal Letters журналында жарияланды.
Ғалымдар бастапқыда бұрыннан белгілі Бета Суретші b ғаламшарының атмосферасын зерттеу барысында NIRSpec спектрографын пайдаланған. Алайда бақылау кезінде тағы бір аспан нысанының белгілері анықталды.
Тікелей суретке түсірудің орнына зерттеушілер нысан атмосферасының химиялық спектрін тіркеді. Онда көміртек тотығы, су буы және метанның іздері анықталған. Бұл деректер нысанның шын мәнінде экзопланета екенін дәлелдеп, оның фондағы жұлдыз немесе қоңыр ергежейлі емес екенін көрсетті. Кейін нәтижелер MIRI құралы мен Өте үлкен телескоптың (VLT) бақылаулары арқылы қосымша расталған.
Зерттеу нәтижесіне сәйкес, Бета Суретші d ғаламшарының массасы Юпитерден кемінде екі есе үлкен. Ол өз жұлдызын шамамен 30 астрономиялық бірлік қашықтықта айналып өтеді. Бұл Нептун орбитасымен шамалас арақашықтық.
Ғалымдардың айтуынша, бұл – қалың шаң дискісінің күшті жарқылы жағдайында орташа ажыратымдылықтағы спектроскопия әдісі арқылы экзопланетаны алғаш рет анықтау болып отыр. Бұл жаңалық болашақта жас жұлдыз жүйелеріндегі жасырын ғаламшарларды іздеуге жаңа мүмкіндік ашуы мүмкін.
Өзге де жаңалықтарды оқу үшін Telegram арнамызға жазылыңыз!