Медицина жоғары оқу орындары студенттерінің шәкіртақысы 20 пайызға көбейеді, деп хабарлайды Stan.kz ақпарат агенттігі ҚР Денсаулық сақтау министрлігінің Ғылым және адами ресурстар департаментіне сілтеме жасап.
2022 жылы республикалық бюджеттің есебінен 4700 білім беру гранты бөлінді, оның 1500-і резидентураға бөлінген. Биылғы жылы Мемлекет басшысының тапсырмасын аясында республикалық бюджеттің есебінен резидентура гранттарының санын 2500-ге дейін ұлғайту көзделген.
“Біздің университеттерді өз клиникалық базаларымен қамтамасыз ету мақсатында 6 университеттік аурухананың құрылысын іске асыру басталды. Бұл дәрігерлерді практикаға бағдарланған даярлауды қамтамасыз етуге, университеттердің мүмкіндіктерін кеңейтуге және ғылымды, озық технологиялар мен білім беру процесін интеграциялау арқылы университеттік клиникаларға республикада денсаулық сақтауды дамытудың драйвері болуға мүмкіндік береді”, – делінген департаментте.
Сондай-ақ, Президент пен «Аманат» партиясының тапсырмасы бойынша шәкіртақы өсті. Мысалы, бакалавриат үшін ол 2 есеге жуық, интерндерде 25%-ға, резиденттерде, магистранттарда, докторанттарда 2021 жылы 15%-ға ұлғайды.
«2025 жылға дейін шәкіртақыны жыл сайын 15% және 20%-ға ұлғайту жоспарлануда. Бұл жақсы оқуға қосымша серпін береді және біздің жоғары оқу орындарына мықты талапкерлерді қосымша тартады», – дейді департамент директоры Дәулет Алдыңғұров.
Сондай-ақ, оның айтуынша, Денсаулық сақтау министрлігі 2021 жылдан бастап өңірлер өтінімдерінің негізінде резидентурада гранттарды бөлуді енгізді. Бұл денсаулық сақтау жүйесінің кадрлық саясатын сапалы жүргізуге мүмкіндік береді.
“2022 жылғы 8 ақпанда салалық біліктілік шеңбері бекітілді. Осы оқу жылынан бастап санитариялық-эпидемиологиялық қызмет мамандарын даярлаудың 5 жылдық бағдарламасы енгізілді. Сондай-ақ, 21 кәсіби стандартты әзірлеу бойынша жұмыс жүргізілді. Бұл жұмыс жалғасуда және 2023 жылы 36 кәсіби стандарттарды әзірлеу және өзектендіру жоспарлануда”, – делінген хабарламада.
Министрлік медицина қызметкерлерінің біліктілігін арттыруға көңіл бөлген. Мәселен, биыл ҒАРД бюджеттік бағдарламасының шеңберінде 4200 дәрігер, оның ішінде 138 шетелдік және 2650 мейіргерді оқыту ұйымдастырылды.
Өзге де жаңалықтарды оқу үшін Telegram арнамызға жазылыңыз!