Өтінім қабылдауға арналған цифрлық платформаның тестілік нұсқасы 15 наурыздан бастап пилоттық режимде іске қосылмақ

Жалға алынған үйдің ақысын субсидиялауға өтініштер осы жылдың 5 сәуірінен бастап қабылданады. Бұл туралы индустрия және инфрақұрылымдық даму министрі Қайырбек Өскенбаев мәлімдеді.

Оның айтуынша, 2022 жылғы 1 мамырда жалға берілетін тұрғын үйді субсидиялау бағдарламасы іске қосылады.

Өтінім қабылдауға арналған цифрлық платформаның тестілік нұсқасы 15 наурыздан бастап пилоттық режимде іске қосылмақ.

«Өтінімдерді 5 сәуірден бастап қабылдауды жоспарлап отырмыз», – деді Өскенбаев үкімет отырысында.

Азаматтар платформада өтінімді Электондық цифрлық қолтаңба арқылы береді. Өтінім берушінің бағдарлама шарттарына сәйкестігі автоматты түрде тексеріледі. Деректерді тексеру мемлекеттік органдардың деректер базасымен интеграциялау жолымен жүзеге асырылады.

Аренда төлемін субсидиялау
2022 жылы мамырда пәтер жалдау төлемін субсидиялаудың жаңа тетігі іске қосылады. Бағдарлама халықтың тұрмысы төмен топтарына арналған. Оған мүгедектер, көпбалалы отбасылар, жетім балалар қатыспақ.

Сатып алу құқығынсыз жалға берілетін пәтерде тұратын азаматтар бағдарламаға ілікпейді.

Субсидиялауға өтініш беру үшін отбасының соңғы 6 айдағы жиынтық табысы отбасының әр мүшесіне шаққанда ең төменгі күнкөріс деңгейінен аспауға тиіс. Яғни, отбасының бір мүшесінің табысы айына 36 018 теңгеден аспауы шарт.

Мемлекет аренда ақысының 50%-ін бюджет ақшасы есебінен өтейді, қалған жартысын отбасы өз қалтасынан төлейді. Алайда мемлекет төлейтін қаржының ішіне коммуналдық төлем кірмейді.