Қызылордада 500-ден астам мал арам өлген Арал ауданында төтенше жағдай жарияланды. Өңірдегі топырақтың құнарсыздығы, малдың аштықтан қырылғандығы сынама нәтижесімен расталды. Оның үстіне аймақта жем-шөп бағасы күннен күнге шарықтап барады, деп хабарлайды Stan.kz ақпарат агенттігі “Астана” арнасына сілтеме жасап.
Аймақта мал азығының бағасы аспандап тұр. Биыл жем-шөпке мемлекет тарапынан берілетін субсидияға қолжеткізу қиындаған. Қордаланған мәселе шаруалардың шымбайына батып тұр.
“Қазір жоңышқа қымбаттап жатыр. 600-700 ден жоңышқа табылмай отыр. Келесі орым 800 дейді. 3-ші орымда бізге берсе 1000-1100 болады. Аралдың өзінде қазір 1200-1400 болып тұр. Биыл мал қатты ауырып жатыр, өліп жатыр. Қыста біраз шығынға ұшырадық. Қазір тағы шығынға ұшырап жатырмыз”, – деді шаруашылық төрағасы Нұрлан Биманова.
Биыл судың тапшылығына байланысты шөптің шығымы төмен. Әсіресе Арал өңірінде жағдай қиын. Көкке аузы тимеген төрт түлік көтерем боп, 500-ден астамы арам өлді. Олардан сынама алған мамандар малдың аурудан емес, аштықтан қырылғанын растап отыр.
“Мал ішетін құдықтардан және қосымша көлдерден сынамалар алынды. Одан бөлек, өлген жылқылардан және мүйізді ірі қарадан сынама алынды. Облыстық ветеринариялық зертханаға тапсырылды. Нәтижесінде теріс нәтиже көрсетті. Яғни ешқандай эпизотиялық ахуал тұрақты. Ауру жоқ. Қуаңшылыққа байланысты, соңғы жылдары жауын-шашын, қыс қарсыз болуына байланысты мал қысқа өте күйсіз түскен. Соның есебінен болып отыр”, – деді облыстық ветеринария басқармасының басшысы Шахмардан Қойшыбаев.
Бүгіннен бастап Арал ауданы бойынша төтенше жағдай жарияланды. Бірақ мамандар мал шығыны өтелмейді дейді. Ал арнайы бөлінген қаржы бірінші кезекте, аштықтан теңселген төрт түліктің жем-шөп тасымалына қажетті жанар жағармайға жұмсалмақ. Және жайылымдарда бітелген суаттардың көзін ашу жұмыстары қолға алынады.
Бұған дейін Арал ауданының әкімдігі құрғақшылық пен мал азығының болмауына байланысты төтенше жағдай енгізуді ұсынғаны туралы хабарланды.
Өзге де жаңалықтарды оқу үшін Telegram арнамызға жазылыңыз!