Илон Масктың SpaceX компаниясы бағдарламалауға арналған танымал жасанды интеллект құралы Cursor-ды әзірлеген Anysphere стартапын сатып алатынын ресми түрде растады, деп хабарлайды «Адырна«.
АҚШ-тың Бағалы қағаздар және биржалар жөніндегі комиссиясына (SEC) тапсырылған құжаттарға сәйкес, мәміле толықтай акциялар арқылы жүзеге асырылады. Келісім аясында Anysphere компаниясының құны 60 миллиард долларға бағаланған.
Бұл ықтимал сатып алу туралы ақпарат алғаш рет 2026 жылдың сәуір айында тараған болатын. Сарапшылар күткендей, мәміленің егжей-тегжейі SpaceX компаниясының IPO-ға шығуынан кейін жарияланды.
Келісім бойынша SpaceX-тің еншілес құрылымы X67 Inc. Cursor компаниясымен біріктіріледі. Дегенмен, Cursor өз қызметін SpaceX-ке толықтай тиесілі компания ретінде жалғастыра береді.
SpaceX сатып алу рәсімін барлық қажетті реттеуші органдардың мақұлдауынан кейін 2026 жылдың үшінші тоқсанында аяқтауды жоспарлап отыр.
Бұл мәміле Илон Маск компаниясының жасанды интеллект саласындағы позициясын күшейтуге бағытталған. Ақпан айында xAI компаниясын өз құрамына қосқаннан кейін Grok моделі бағдарламалау міндеттерін орындауда Anthropic, OpenAI және Google компанияларының шешімдерінен қалып қойған еді.
Ал Cursor бүгінде бағдарламалауға арналған жасанды интеллект құралдары нарығындағы ең қарқынды дамып келе жатқан өнімдердің бірі саналады. Сондықтан Anysphere-ді сатып алу SpaceX-тің бұл бағыттағы бәсекелестік әлеуетін едәуір арттыруы мүмкін.
Өзге де жаңалықтарды оқу үшін Telegram арнамызға жазылыңыз!