Петропавлдық отбасының пайдаланған су үшін қарызы 800 мың теңгеге жеткен. Сумен қамтитын компания соттың шешімімен борышкерлерге қатаң шара қолдана бастады, деп хабарлайды Stan.kz ақпарат агенттігі ҚазАқпаратқа сілтеме жасап.
«Петропавл Су» ЖШС баспасөз қызметінің мәліметінше, Петропавл тұрғындарының сумен қамтушы компанияға 30 млн теңгеге жуық қарызы бар. Бір отбасының берешегі 800 мың теңгеге жеткен. Олар шамамен 20 жылдай пайдаланған су үшін коммуналдық ақы төлемеген.
«Айына орташа 3,5 мың теңге шығады. Қаншама ескерткенімізбен қарыздан құтылуға тырыспады. Енді ол пәтерге кәріздік бітеуіш қойылады. Жалпы мұндай қатаң шара қолданбас бұрын 30 күн бұрын ескертіп, тұтынушыға хабарлама жібереміз. Егер осы аралықта қарызды төлемесе, соттың шешімімен кәріздік құбырға бітеуіш салынады. Әдетте мұндай шараны берешегі 15 мың теңгеден асып кеткенде қолданамыз. Төлеген жағдайда бітеуішті ақша төлеп алғызады», – дейді кәсіпорынның тұтынушылармен жұмыс бойынша бөлім басшысы Нұргүл Самалықова.
Мамандардың айтуынша, бітеуіш қойғаннан кейін ғана тұрғындар қарыздан құтылуға тырысады.
Петропавлда қазір 500-ден астам абонент судың ақысын төлемегендіктен, сумен қамтитын компанияның есебінде тұр.
Өзге де жаңалықтарды оқу үшін Telegram арнамызға жазылыңыз!