Мемлекет басшысы Қасым-Жомарт Тоқаев Қазақстан халқын Бірлік күні мерекесімен құттықтады деп хабарлайды Stan.kz ақпарат агенттігі.

Президент Қазақстанның сан алуан этнос өкілдерінің құтты мекеніне айналғанын алға тартып, ел үшін бірліктің маңыздылығына тоқталды.

“Қадірлі отандастар! Сіздерді Қазақстан халқының бірлігі мерекесімен шын жүректен құттықтаймын! Бұл – тұрақтылық пен тыныштықты, татулық пен келісімді дәріптейтін мейрам.

Ел бірлігі – біздің баға жетпес байлығымыз, мемлекеттілігіміздің берік негізі. Қазақ жері сан алуан этнос өкілдерінің құтты мекеніне айналған. Барлық азаматтарымыз өткен тарихы, бүгіні мен болашағы бір екенін терең ұғынады. Өйткені жұртымыздың құндылықтары да, арман-мұраттары да ортақ. Түптеп келгенде, бәріміз – үлкен қара шаңырақтың, біртұтас қазақ ұлтының перзенттеріміз”,- деді Тоқаев.      

Мемлекет басшысы еліміздің өсіп-өркендеуі қолға алған реформалардың тиімді жүзеге асырылуына байланысты екеніне тоқталды. Ал осы мақсаттарға жетуге мызғымас бірлік сеп болмақ.

“Халқымыз «Ырыс алды – ынтымақ» дейді. Бабаларымыздың бұл өсиеті – Әділетті Қазақстандағы басты ұстанымның бірі. Біз татулық, теңдік және әділдік қағидаларына негізделген қоғам құрамыз. Бірлігі жарасқан жұртымыздың абыройы асқақ болсын!

Баршаңызға бақ-береке және толағай табыс тілеймін! Мереке құтты болсын, ағайын!”,- деді Тоқаев.

 

Өзге де жаңалықтарды оқу үшін Telegram арнамызға жазылыңыз!