Сырда велоспорттың қарқыны тұралап, Марат Сатыбал­диев пен Сергей Капустинның жетістігін жалғайтын шабан­доздар жоқтың қасы еді. Жақында Үндістанда үміт оянып, Аслан Силықбек қос аңыздың жолын қайта жалғады. Нью-Делиде жерлесіміз жеңімпаз ата­нып, Сыр спортының жарқын көрінісін байқат­ты. Азияны бағындырған шабандозды туған жерге келісімен әң­гі­меге тарттық.

– Аслан, Азия чемпионатындағы алтын жүлдең құтты болсын! Алтын  оңай келмегені анық…

– Рақмет, жарыс жоғары деңгейде өтті. 4 шақырымды құрады. Азия біріншілігіне ұзақ мерзімде дайындық жүргіздік. Нұр-Сұлтан қаласында оқу-жаттығу жиындары бірнеше айға созылды. Одан бөлек Парижде әлем кубогына қатысып, өз-өзімізді қамшылап алдық. Парижде көрсеткішке қарағанда физикалық күш қуат жинауымыз маңызды болды. Бапкердің тапсырмасына сәйкес барлығын сәтті жүзеге асырдық. Үндістанға баруымыздың өзі қызық болды. Бірден бара салмадық. Алдымен іріктеу болды. 8 велошабандоз Нұр-Сұлтан қаласында дайындалдық. Бас бапкер Тимур Харисов сегіздің ішінен алтауын қалдырды. Жарыс таяған сәтте тағы біреуімен қоштасуға тура келді. Солай 5 жүйрік Азияға аттандық.

– Үндістанда адаптация қалай қалыптасты?

– Дұ­рыс айтасыз, спорт­шы­лар үшін адап­тация өте ма­ңыз­ды. Климат ауыс­ты­ру кей­бі­реуі­не оң нәтиже берсе, кейбіреуіне керсінше. Сондықтан адаптацияға қатты көңіл бөлеміз. Үндістан Азияда орналасқандық­тан қатты әсер етпеді. Ауа-райына жылдам бейімделіп кеттік.

– Ве­ло­трек сайы­сы ко­ман­да­лық эс­тафетадан тұратыны белгілі. Үндістанда дәл осы командалық сайыстан топ жардың. Жабық аренадағы  жарысқа тоқта­лайық­шы…

– Ко­ман­дамыз 5 спорт­шыдан жа­сақ­тал­ды. Оның біреу қосалқы құрам­да бол­ды. Негізгі құрам­нан бірі жа­ра­қат не болмаса сырқаттанып қалса соның орнын басатын болды. Ал негізгі құрамда Максим Тарскин, Илья Кара­бутов, Вадим Белу­гин­мен бір­ге өнер көрсет­тік. Іріктеу сы­нын­да сүрін­бедік. Іріктеу кезең­дерде жарысты бірінші бастап жүрдім. Бұл  командалық жарыста күрделі кезең болып есептеледі. Бар ауыртпашылықты мойныма алып, финалға өтуге барымды салдым. Ал финалда мәрені аяқтайтын қорытынды шабандоздың қызметін атқардым. Кореядан 3 секундқа алға шығып, жеңімпаз атандық. Үздік үштікті жарыстың қожайындары түйіндеді. Жалпы елге еңбектің арқасында абыроймен оралдық.

–  Асланды алда қандай жарыстар күтіп тұр?

– 23 шілдеде Нұр-Сұлтан қаласында ел біріншілігі өтеді. Сол біріншілікте бағымды сынап көруге бел байлап отырмын. Қазір жеке бапкерім Берік Көпешовпен дайындықты бастап жатырмын. Ел чемпионаты 4 кезеңнен тұрады. Соның скритч сайысы өзімнің оң жамбасыма жақын. Сол кезеңнен ел чемпионы болуды көздеп отырмын. Әрине, оңай болмасы анық. Үндістанда бір командада өнер көрсеткен Максим, Илья, Вадим әріптестердің барлығы негізгі қарсыласым болады (күліп). Сондықтан ел чемпионаты да тартысты өтетіні айқын.

 

Өзге де жаңалықтарды оқу үшін Telegram арнамызға жазылыңыз!