Фото: istockphoto.com
Қазақстанда 2024 жылдың көктемгі кезеңі аясында кеңауқымды ветеринариялық профилактикалық іс-шаралар басталды, деп хабарлайды Azattyq Ruhy.
Ауыл шаруашылығы министрлігінің мәліметінше, бұл іс-шаралардың мақсаты – эпизоотиялық салауаттылықты қамтамасыз ету және республика бойынша жануарлар арасында жұқпалы аурулардың таралуын болдырмау.
«Жануарлардың ерекше қауіпті 25 ауруы, оның ішінде бруцеллез, лейкоз, жылқы жұқпалы анемия және т.б. бойынша 13 635,6 миллион теңгеге 74,9 миллионнан астам диагностикалық зерттеулер жүргізу жоспарланып отыр.
Сонымен қатар 178,2 млн манипуляция жасау жоспарлануда. Бүгінгі таңда республикалық қорда жануарлар мен құстардың 23 ауруына қарсы 77,0 млн доза вакцина бар, олар көктемгі кезеңнің алдын алу шараларын уақтылы жүргізу үшін жергілікті атқарушы органдарға жолданды», – делінген хабарламада.
Іс-шараларға бүкіл ел бойынша ветеринариялық қызметтер, соның ішінде ветеринариялық станциялар мен пункттер қатысады. Үй жануарларының иелері жануарларын тексеру және вакцинациялау үшін қолжетімді етуге шақырылады.
Бұл бастама жануарлар арасында жұқпалы аурулардың пайда болу және таралу қаупін азайтуға бағытталған. Қазіргі таңда бекітілген жоспарға сәйкес диагностика және екпе жұмыстары басталып кетті.
Өзге де жаңалықтарды оқу үшін Telegram арнамызға жазылыңыз!