Алматыда дене шынықтыру сабағында 3-сынып оқушысы ауыр жарақат алды, деп хабарлайды Bugin.kz порталы tengrinews.kz сайтына сілтеме жасап. Бұл оқиға 14 желтоқсанда Алматы қаласындағы №48 мектеп-лицейде болған. Оқиғаның мән-жайын баланың анасы айтты.
Бала сүйегінің жабық сынығымен, сол жақтағы жоғарғы жақсүйек қойнауының алдыңғы қабырғасының ығысуымен, сол жақ көз алмасының 1-дәрежелі контузиясымен, сол жақ параорбитальды аймақтың жұмсақ тіндерінің контузиясымен ауруханаға жатқызылды. Сондай-ақ балаға жабық бассүйек-ми жарақаты мен ми шайқалу диагнозы қойылды.
«21 желтоқсанда оның бетіне күрделі ота жасалды: көзіне титан торы орнатылды, сүйек сынықтары алынды, бет сүйегіне титан пластина орнатылды. Бұл енді мәңгілікке бет жақтауының бөлігі болады. Менің ұлым 9 жаста. Бас сүйегі өсіп келеді, өсу және беттің деформациясы болуы мүмкін. Қайталанатын хирургиялық араласу керек болады. Жоғарғы жақсүйек синус аймағында төменгі бөлігі сынған, тіпті, жоқ. Біраз уақыттан кейін жақтаудың осы бөлігін қалпына келтіру үшін бұл жерге имплант орнатылуы мүмкін. Бірақ бұл бір жылдан ерте емес», – деді баланың анасы.
Анасының айтуынша, бұл дене шынықтыру сабағында баланың басқа баламен соқтығысуы салдарынан болған. Алайда мұғалім мен мектеп басшылығының одан әрі әрекеті әйелдің ашуын келтірді.
«Балаға қажетті медициналық көмек көрсетілмеді, жедел жәрдем шақырылмады. Олар оқиғаны жасыруға тырысты. Оқиғадан кейін бірден мұғалім қоңырау шалып, жедел жәрдем шақыру керек пе деп сұрады. Жағдайды тым жеңіл сипаттады. Сипаттауға сәйкес мен оның жағдайын ауыр деп қабылдамай, өзім келемін дедім, тіпті, подъезге шығуын өтіндім. Мен баламды көргенде, бәрі олар сипаттағаннан әлдеқайда маңызды екенін түсіндім. Себебі, ол аяғына әрең тұрды. Мен баланы өз қолыма көтеріп алып шықтым (оны бейнелердің бірінен көруге болады) және оны ауруханаға өз бетіммен апаруды шештім. Бірақ кептеліс қатты болып, баламның жүрегі қатты айни бастады. Сондықтан үйге жедел жәрдем шақырдық, біз мектептен 5 минуттық жерде тұрамыз. Үйден бізді жедел жәрдеммен ауруханаға жеткізді», – деді анасы.
Әйел мектеп әкімшілігін кейін де баланың жағдайы қызықтырмағанын айтады.
«Мұғалімдердің ешқайсысы келмеді, тіпті, хабарласпады. 20 желтоқсанға дейін мен өзім телефон соғып, болған жағдайды директор А.Б.Қонақпаеваға айттым. Ол қоңыраудан кейін мұғалім телефон соғып, «директорды сотқа бересіз бе» деп сұрады. Бұл сынып жетекшісінің бірінші қоңырауы болды. Денсаулық жағдайына қызығушылық болған жоқ. Директор мектеп инспекторына хабарлаған жоқ, мен өзім полиция бөліміне телефон соғып, болған оқиғаны хабарладым. Мектеп өкілдерінің ешқайсысы ауруханаға келген жоқ. Бізге мүлдем немқұрайлы қарап, адамгершілікке жатпайтын қарым-қатынас жасады», – деп қосты ол.
Сондай-ақ баланың анасы дене шынықтыру сабағында қауіпсіздік шаралары сақталмайтынын, бір спорт залында бірден бірнеше сыныптың – жоғары және кіші сыныптардың болатынын, дене шынықтыру пәнінің мұғалімі оқиға кезінде телефоннан бас алмайтынын алға тартады. .
«Балаларды өз еркімен қалдырған. Мұндай немқұрайлылық ұлымыздың басынан өткен жағдайға әкелуі мүмкін. Ұлымның айтуы бойынша, оқиға болған күні мұғалім балаларға ойын беріп, өзі орындықта телефон қарап отырған. Балалар бақылаусыз залды айналып жүгіреді. Мұның растауын мұғалімнің өзі берген түсіндірмеден білдім. Бірақ ол мұны басқаша сипаттайды. Мұғаліммен сөйлескенімде, бұл растауым бар. Өте ауыр соққы тиген, адамдар апаттарда, ауыр төбелестерден осындай жарақат алады. Егер мұндай жарақат алатынын білсе, онда мұғалім бәрін ескеру керек еді. Сонымен қатар ойынды толық бақылауға тиіс еді. Оның үстіне комиссияның өзі сабақта қауіпсіздік шаралары сақталмағанын анықтады. Мен мектепке дені сау баланы әкеліп, оны өмір бойына қалатын жарақатымен алып кеттім», – дейді баланың анасы. .
Баланың ата-анасы полицияға арызданған. Оның үстіне ол күндері спорт залындағы камералар да жұмыс істемейтін болып шықты.
Қазір бұл факті бойынша Алматы қаласы Медеу ауданының полиция бөлімі тергеу жүргізіп жатыр.
«Баланың алған жарақатының ауырлығын анықтау үшін сот-медициналық сараптама тағайындалды. Тексеру шаралары кешенінің қорытындысы бойынша шешім қабылданады», – деді полициядағылар.
Баланың ата-анасы бұл мәселені соңына дейін көргісі келеді. Олар Алматыдағы No48 мектеп директорын қызметінен босатуды талап етіп отыр.
«Бүгінгі күні баланың көру қабілеті бұзылған. Біз қажетті мамандарға барамыз, оңалту үшін қажет және ұсынылғанның барлығын жасаймыз, бұл алты айға созылады. Ұлымыз офлайн оқуға 2023 жылдың 1 қыркүйегінде ғана оралады. Бұдан кейін де денсаулығына аса сақ қарауы қажет. Қажет болса, ол дене шынықтыру сабақтарынан босатылуы керек. Ал бұл жағдайға дейін спорт оның өмірінің бір бөлігі еді. Жүзу, шағын футбол сияқты спорт секцияларына барды. Мұғалімдер мен мектеп әкімшілігінің салғырттығы ұлымыздың өмірін толық өзгертті. Бұған жол берген адамдар жазасыз қалмауы керек», – деп түйіндеді баланың анасы.
Өзге де жаңалықтарды оқу үшін Telegram арнамызға жазылыңыз!