Қазақстанда су тарифі өзгеруі мүмкін. Аталған мәселе бойынша Экология министрлігі құзырлы органдарға ұсыныс әзірлеп жатыр. Бұл туралы ҚР Экология және табиғи ресурстар министрлігі cу ресурстары комитеті төрағасының міндетін атқарушы Досбол Бекмағамбетов мәлім етті, деп хабарлайды ҚазАқпарат тілшісі.
«Бүгінде республикаға қарасты 3440 су каналы жүйелері бар. Шаруаларға су сол жүйелер арқылы жеткізіледі. Су каналы жүйелері кезінде коммуналдық меншікте болып, көбі қазіргі су тарифіне кірмеген. Яғни қазіргі тариф бойынша оларды күтіп ұстауға қаржы қарастырылмаған. Осы орайда биыл біз мемлекеттік құзырлы органдарға өз ұсынысымызды жолдаймыз. Келесі жылы әділетті су тарифі бекітіледі деп ойлаймыз»,- деді Досбол Бекмағамбетов «Қазгидромет» мекемесінде өткен баспасөз мәслихатында.
Министрлік өкілінің мәлімдеуінше, су қоймаларын күтіп ұстау – үлкен мәселе.
Сондай-ақ, спикер су саласы мамандарының жалақысы мәселесін көтерді.
«Су саласы қызметкерлері – еліміздегі ең төмен жалақы алатындардың бірі. Сондықтан да проблеманы тариф арқылы шешпесек, басқа жолы жоқ. Мемлекеттен қаржы алмаймыз, қанша көлемде су жеткіземіз, соны ақысын шаруалардан жинап аламыз»,- дейді ол.
Досбол Бекмағамбетовтің дәйегінше, бүгінде су саласы мамандарының орташа жалақысы 90 мың теңгеден аспайды.
Бұған дейін пайдалануға берілгеніне 70 жылдан асып кеткен су қоймалары туралы хабарлаған едік.
Өзге де жаңалықтарды оқу үшін Telegram арнамызға жазылыңыз!