Ким Ки Дук – оңтүстік кореялық сценарист, режиссер. Шығармашылығымен әлемге танымал сценаристің фильмдері көрерменді бейжай қалдырмайды.Құдайды, адам болмысын тану мәселесін көтерген аңыз адамның кино түсіруге, шығармашылыққа қатысты ойларымен бөліспекпіз.

Қыс – менің өмірім! Буддизмде қыс мезгілі адамның өлім алдында өз өмірін бағалау кезеңі болып сипатталады. Мен әр қыс сайын өзімді өлім алдындағыдай сезінемін. Сондықтан табиғатқа оралғым келеді.

*     *     *     *     *

Білесің бе, ұзақ өмір сүргісі келетін адам кино түсірумен айналыспағаны дұрыс. Қандай да бір киноны түсіріп бастасаң, бірнеше өмірді қатар сүресің. Ал өз өмірің байқалмай жаныңнан өте шығады.

*     *     *     *     *

Мен өз фильмдерімді бір апта не он күннен артық түсірмеймін. Кино түсіру – өзіңді суперкомпьютер сезіну. Егер он күннен артық түсірсем, жарылып кететін шығармын. Жай ғана өліп қалатындаймын.

*     *     *     *     *

Жақсы фильм тек қана қымбат бюджетке түсірілген дүние емес. Ең бастысы идея, жақсы сценарий және киноны түсіруге деген құлшыныс.

*     *     *     *     *

Мен адамға сұрақ қоя білетін фильмдерді жақсы көремін. Кино көріп отырып, өз сұрағыма жауап іздемеймін. Керісінше дұрыс қойылған сұрақ іздеймін. Сұрақ қана адамды ойландырады.

*     *     *     *     *

Әңгіме, диалог киноның маңызды бөлігі емес. Дауыссыз, сөзсіз түсінуге болатын киноны жаным сүйеді.

*     *     *     *     *

Менің соңғы шыққан фильмдерім жайлы «студенттің жұмысы сияқты» деген пікірлер естідім. Бірақ бұған түк ренжімеймін. Себебі бәріміз – өмірдің студентіміз.

*     *     *     *     *

Кино түсіруде корей ұлттық мәдениетін әлемге таныстыру немесе таныту мақсатын ұстанған емеспін. Мен әлемнің әр нүктесіндегі қоғамның ауыр мәселелерін ашып көрсеткім келді.

*     *     *     *     *

Әйелге зорлық-зомбылық жасап, әлсіздерге күш көрсету, жалпы зорлық атаулының бәрі өміріміздің бір бөлігі. Ол әлемнің барлық жағында,барлық қоғамда бар.

*     *     *     *     *

Біз бәріміз арманды, армандауды қажет етеміз. Өйткені арман ғана тірі екеніңді сезіндіреді.

*     *     *     *     *

Кино – бұл ақша жасау тәсілі емес, адамға бірдеңе айтуға деген құштарлық.

Орыс тілінен аударған:

Дина БӨКЕБАЙ

 

Өзге де жаңалықтарды оқу үшін Telegram арнамызға жазылыңыз!