Қазақстан ММА-ден жастар арасындағы әлем чемпионатында алғаш рет І орынға қол жеткізді. Сербия астанасы Белградта өтіп жатқан әлем чемпионатында астаналық сайыпқыран Ерсұлтан Шәкенбай өткен жылғы чемпиондық атағын қорғап, екі дүркін Әлем чемпионы атанды.
Төрткүл дүниенің 60 мемлкетінен 600-ден астам спортшы бақ сынасуда. Қазақстанның намысын қорғауға ұлттық құраманың 33 спортшысы білек сыбана кіріскен. Байрақты бәсекеде 18-20 жастағы жастар арасындағы финалдық жекпе-жек өтті. Қазақстан құрамасының қоржынына 3 алтын, 2 күміс және 5 қола медаль түсті. Алғашқы алтын медальді қанжығаға байлаған дарынды спортшы Ерсұлтан Шәкенбай 56,7 келіге дейінгі салмақта өнер көрсетті. Ол финалда тәжікстандық Лоик Икромовты қылқындыру әдісімен жеңді. Айта кетейік, Ерсұлтан барлық жекпе-жектерін мерзімінен бұрын аяқтады.
Сондай-ақ, екінші алтынды Ақмола облысының тумасы Матильда Бачурина, ал үшінші алтынды ұлттық құрама қоржынына Идрис Идрисов салды. Мұнан бөлек, қола медальға қол жеткізгендер қатарында Аяулым Ұлан (Алматы облысы), Динара Аяпова (Ақтөбе облысы), Жанерке Жамалбеков (Жамбыл облысы), Самат Төлегенов (Астана), Шыңғыс Ыдырысов (Алматы облысы) бар. Ал Қазақстан құрамасы ММА бойынша жастар арасындағы әлем чемпионатында алғаш рет І орын иеленді.
Өзге де жаңалықтарды оқу үшін Telegram арнамызға жазылыңыз!