Қызылорда облыстық әуесқойлар футбол лигасы кезекті маусымын қорытындылады.  Жеті айға созылған чемпионатта 7 лига 88 команда және аладопқа аңсары ауған 2000-ға жуық қала тұрғындары  қатысты.

 Жазғы маусымның жаңалығы  балалар және жасөспірімдер лигасының ашылуы болды. Оған 22 команда, 200-ге жуық ойыншы қатысты. Балалар және жасөспірімдер лигасының үлкен тобында «Динамо», орта топта «Қайсар 2010» және кіші топта «Намыс» футбол мектебі жеңіске жетті.

Біріншіліктің биік сатысы саналатын Суперлигада  «Абай-дәулеттің» мерейі үстем болды. Ал жүлделі екінші орын «КГЭК-ке» бұйырса, «Дәулет» үздік үштікті қорытындылады. 

«А» лигасында  «Отбасы банкке» тең келер қарсылас табылмады.  «В» лигасында «Яксарт» жеңімпаз атанды. Күміс «ALTAIS-қа», қола «Разведполк-қа» бұйырды. «С» лигасында «Нағи» командасы чемпион атанды. Кейінгі орындарға  «Спартак» пен «Жаңақала» жайғасты.

Марапаттау рәсімінде «Қарекет» қайырымдылық қоры бір отбасының шаңырақ көтеруіне үлесін қосып, шараның шырайын келтірді.

Ерасыл ШӘРІБЕК