Тұрғын үй құрылысы бағдарламаларында жас отбасылар үшін квота енгізіледі. Бұл жайында Мәжіліс депутаттарының сауалына ҚР Премьер-Министрінің орынбасары Ералы Тоғжановтың жауабында айтылған, деп хабарлайды ҚазАқпарат тілшісі.
«Бүгінгі таңда Nur Otan партиясының «Өзгерістер жолы: әр азаматқа лайықты өмір!» жол картасы аясында жастарды тұрғын үймен қамтамасыз ету мақсатында жергілікті атқарушы органдардың 2025 жылға дейін өздерінің өңірлік тұрғын үй бағдарламаларын кезең-кезеңімен әзірлеуі көзделген. Алматы қаласында, Алматы, Қарағанды, Қызылорда, Жамбыл және Батыс Қазақстан облыстарында осындай бағдарламалар іске асырылуда», – делінген вице-премьер жауабында.
Вице-премьердің атап өтуінше, аталған бағдарламалардың аясында жас мамандарға бастапқы жарнасы 10 пайыз және 25 жылға дейінгі мерзімге ипотека беріледі.
«Ұлттық рухани жаңғыру» ұлттық жобаның тағы бір көрсеткіші жас отбасылар үшін тұрғын үй құрылысының барлық бағдарламалары бойынша қарыздар үлесін 2025 жылға қарай 25 пайызға 2021 жылы – 5 %. 2022 жылы – 10 %, 2023 жылы – 15 %, 2024 жылы – 20 %, 2025 жылы – 25%.) дейін жеткізу болып табылады. Ол үшін тұрғын үй құрылысы бағдарламаларында жас отбасылар үшін квоталар енгізілетін болады», – деді Ералы Тоғжанов.
Өзге де жаңалықтарды оқу үшін Telegram арнамызға жазылыңыз!