Талай жылдық тарихы бар каталондық «Барселона» клубын футбол сүйер көрермен жақсы білсе керек. Алпауыт клубтың құрамында қандай футболшылар ойнамады десеңізші?! Төрткүл дүниені аяғына телмірткен атақты футболшы – Лионель Мессидің өзі осы клубтың шекпенінен шықты. Бойы аласа аяқдопшының талантын байқаған клуб ұжымы дереу келісімге келіп, оның денсаулығына қатысты мәселенің барлығын өз мойындарына алды.
Сол секілді кейінгі уақытта қосылған ойыншылар қатарында Боян Кркич есімді аяқдопшы болды. Болашағынан зор үміт күттіретін оны көпшілік Мессидің ізбасары деп, клубтың аңызына балаған. Алайда көптеген жарақат ойыншының болашағын бұлыңғыр етті. Міне, осындай жастай жарқыраған футболшылардың қатарын испаниялық шабуылшы Ансу Фати де толықтырады. Оның да келешегі көпке ұзамай, жарақатының салдарынан ұзаққа бармады.
Атақты клубтың академиясы жас ойыншыларға бай. Кейінгі 2-3 жылдықта Хави мен Иниестаның орнын басатын Гави мен Педри есімді жартылай қорғаушыларды көпке таныстырды. Одан қалды Пуйоль, Жерар Пике, Хавиер Маскерано сынды қорғаушылардың орнын жоқтатпау үшін Пау Кубарси есімді жас талант өзін дәлелдеп келеді. Ендігі мәселе – шабуылда. Жыл сайын негізгі құрамға ойыншылар қосатын каталондық клубтың бұл ретте де жолы болды. Өйткені академияда бала күннен тәрбиеленіп, ұжымның барлық сынынан өткен жас талант – Ламин Ямальдың есімін қалың жұртқа паш етті. 15 жасында «Барселона» клубының негізгі ойыншысы атанған бұл оқушы бала жаз айларында өткен Еуропа біріншілігінің чемпионы атанып, түрлі рекордтарды бұзды.
Әлемдік футболдың болашағынан зор үміт күттіретін Ямальменқойылған жаңа келісімшарт рекордтық көрсеткішке жетті. Яғни қазіргі күні 1 миллиард еуроға бағаланып отыр.
Ламин Ямаль 2007 жылы Испанияда дүниеге келген. Ол өз жолын «Барселона» академиясында бастаған. 2022 жылы, небәрі 15 жасында, клубтың негізгі құрамында дебют жасап, әлем футболындағы ең жас ойыншылардың бірі ретінде танылды. Биыл, маусымда Ламин Ямаль 16 матчқа қатысып, 6 гол соғып, 8 пас беріп үлгерді.
Бұл ойыншы неге мұнша қомақты қаражат алады? Бұл шара, әдетте, талантты ойыншыларды басқа клубтарға ауысып кетпеуі үшін жасалады. Мәселен, Лионель Месси, Неймар және Педри сияқты ойыншылардың келісімшарттарында да осы мәселе қарастырылған болатын.
«Transfermarkt» дерегі бойынша, Ямальдың нарықтық құны 120-150 миллион еуро аралығында бағаланады. Бірақ «Барселона» басшылығы оның потенциалын ескере отырып, оған ерекше шарттар қойды.
Ламин Ямаль өз сұхбаттарында «Барселонада» ұзақ уақыт болғысы келетінін және жолын осы клубта аяқтағысы келетінін бірнеше рет айтқан.
Клуб басшылығы оның ерекше қабілеттерін мойындап, болашағын осы ойыншыға сеніп тапсырып отыр. Бас жаттықтырушы Ханс Дитер Флик те жас ойыншыны негізгі құрамға жиі қойып, оның тәжірибесін арттыруда.
Ламин Ямальдың «Барселонамен» жаңа келісімшартқа отыруы жалпы клуб тарихындағы маңызды оқиғалардың бірі. Клубтың жас таланттарға сенім білдіруі және оларды дамытуға ерекше назар аударуы батыл, әрі жөн шешім. Бұл келісімшарт футбол әлемінде сенсация тудырды, себебі мұндай жоғары сомадағы өтемақы өте сирек кездеседі. Алдағы уақытта Ямальдың жетістіктері жанкүйерлер мен сарапшылардың назарында болары сөзсіз.
Айсара МЕЙРАМБЕКОВА
Өзге де жаңалықтарды оқу үшін Telegram арнамызға жазылыңыз!